無路用的人 （台語詩）
昨暝醫生檢查診斷
診斷我目頭高高
腹肚空空
做代誌無要無緊
講話無輕無重
歕雞規袂喘 1歕雞規：吹氣球。
白賊面袂紅 2白賊：說謊。
確確實實
是一個無路用的人
阮某聽著歡喜一晚
歡喜嫁了對人
歡喜艱苦這呢濟冬 3這呢濟冬：這麼多年。
總算時來運轉
佇這呢慘澹的時機 4佇：在。
顛倒有出頭的希望
講若以前
有路用的人做工
有路用的人做田
有路用的人
無論做啥
攏加加減減
會當照顧著別人 5會當：可以。
愈有路用的人
就會當照顧著愈濟人
無路用的人
是家庭的負擔
是國家的負擔
無路用的人
無論做啥
攏加加減減
會去拖累著別人
愈無路用的人
就會去拖累著愈濟人
好佳在真無簡單
拄著無路用的政權 6拄著：遇到。
短短的時間
會當甲生活創予足沉重 7創予：搞得
會當甲社會創予足混亂 8足：很。
予無路用的人 9予：給。
有發揮的空間
予無路用的人
充滿無限的希望
我聽了嘛歡喜一晚
歡喜無路用的人
總算有出頭的一工 10工：天。
決定欲去報名 11欲：要。
參加無路用的政權
自古以來
龍交龍 鳳交鳳
英雄惜英雄
好漢疼好漢
無路用的人
一定比有路用的人
較了解無路用的政權
無路用的政權
嘛一定比有路用的政權
擱較需要無路用的人
無嘛加加減減
愛用著歕雞規袂喘
白賊面袂紅的公關
無嘛加加減減
有欠著目頭高高
腹肚空空的官員
或者是
無要無緊
無輕無重
愛滾笑的官員
只要無路用的政權
無相棄嫌
只要偉大的主人
願意慢慢仔等
予無路用的人
一點點仔時間
一定會當甲阮某的負擔
擴大予變成國家的負擔
一定會當甲阮某的風險
擴大予變成全民的風險
欲予外濟人破產
就予外濟人破產
只要無路用的政權
無相棄嫌
只要偉大的主人
願意慢慢仔等
擱再予無路用的人
一點點仔時間
保證一定會當
甲二千三百萬人的台灣
擴大予變成十三億人的台灣
欲予民主變共產
就予民主變共產
慢慢仔等
慢慢仔等
只要偉大的主人
願意慢慢仔等
相信一定會等著彼一工
慢慢仔等
慢慢仔等
歷史會流傳
別人的歷史一定會流傳
曾經有一個國家
消失佇人性的烏暗
伊的名叫台灣
陳建成 2008/11/20
留言列表
